‘n Goed beplande waterfokuspunt kan ‘n baie rustige atmosfeer aan ‘n tuin skep. Vir ‘n groter tuin is ‘n groterige visdam die ideale fokuspunt.
Ons kry twee tipes waterfokuspunte: 1. ‘n natuurlike omgewing word geskep waar die water met die tuin saamsmelt in die vorm van byvoorbeeld ‘n watervalletjie wat natuurlik lyk met so min as moontlik onnatuurlike hulpmiddels en 2. ‘n ornamentele fokuspunt wat ‘n panoramiese atmosfeer skep met beeltjies, bruggies, fonteintjies ens.
Laasgenoemde tipe waterfokus moet kunstig en goed beplan wees sodat die onnatuurlike hulpmiddels natuurlik lyk. Beeldtjies ens wat gebruik word moet nie uit hul plek lyk nie, maar eerder asof hulle met die omgewing saamsmelt. Indien hierdie tipe fokuspunt nie goed beplan word nie, is die resultaat gewoonlik baie teleurstellend. Ons het in Florcom se tuin by Nylstroom (Modimolle) twee groot visdamme. By die een het ons ‘n natuurlike omgewing probeer skep en by die een, wat ons hier wys, ‘n sprokiesatmosfeer.
KLIEK OP FOTOS VIR ‘N DUIDELIKER BEELD.
Ons sprokieswatertuin is naby die hoek van die tuin, omring deur lowerplante en eers van naby af sigbaar. Ten einde die watertuin by die res van die tuin te laat saamsmelt, is die watertuin in ‘n lowerbedding wat op ‘n vloeiende manier met ander beddings verbind is. Hierdie beddings word deur ‘n grasperk omgrens. Let op die lig aan die kant van die bedding wat die watertuin saans toeganklik maak en ‘n sagte lig op die omgewing gooi.
‘n Fonteintjie wat water ongeveer twee meter hoog die lug opskiet is een van die baie kenmerke van die dammetjie. ‘n Voetpaadjie wat deur die tuin kronkel loop oor ‘n sementbruggie en loopklippe wat in die dammetjie gemessel is.
Potplante word gebruik om kleur aan die dammetjie te verskaf. Die potte op die onderste foto is op ‘n smal strokie op die wal van die dammetjie gepak. Die stam van ‘n groot poniestert is regs agter sigbaar. Die impatients help ook om die paddafonteintjie minder geisoleerd te laat lyk.
Die meisie met eend skakel mooi in tussen die klippe. Die impatients aan die voet van ‘n luiperdboom laat die beeldtjie mooi met die omgewing saamsmelt.
‘n Spesiale sitplek is vir die visserman gebou en die lelies voltooi die prentjie. Clivias, boodbome en ‘n poniestert is op die agtergrond.
‘n Arend onder die Draceanas hou toedig oor die dam.
Op die onderste foto kan gesien word hoe poniesterte, Draceanas, kokospalms, visgraadpalms en bamboespalms gebruik is om ‘n tropiese atmosfeer te skep. Regs van die poniestert steek ‘n bankie uit vanwaar die dammetjie geniet kan word. Die blou in die middel op die voorgrond is die hoed van die kaboutervisserman wat uitsteek. Die wit stam van ‘n luiperdboom is links van die gemesselde waterfilter. Die boom regs van die filter is ‘n vaalbos (Terminalia sericea).
Impatients in ou driepootpotte versier ‘n oop spasie langs die dam.
Hierdie dammetjie verskaf ure se kykgenot aan Florcom se tuin. Waar ‘n ornamentele waterfokuspunt dikwels nie tot sy reg kom nie, kan die volgende help om so ‘n dammetjie suksesvol uit te lê:
- Probeer om die fokuspunt ‘n eenheid met die res van die tuin te maak. Dit kan gedoen word deur die fokuspunt deel van ‘n bedding, wat vloeiend na ander beddings oorloop, te maak.
- Beeldjies en ornamente moet goed met die omgewing inskakel. Gebruik klippe, stompe en potplante om dit reg te kry.
- Potplante wat goed geplaas is, help baie om ‘n kleurryke atmosfeer te skep. Hierdie potte kan, wanneer die plante uit blom is, met ander plante vervang word.
- Gebruik plante van verskillende hoogtes, blaarvorms en blaarkleure as agtergrond.
- Omringende plante moet nie ‘n digte muur teen die dammetjie skep nie, maar jou toelaat om in die beddings verder as net die dammetjie te kyk.
