Plant van die week – Kokerboom (Aloe dichotoma)

Botaniese naam

Aloe dichotoma.

Gewone naam

Gewone Kokerboom (Quiver Tree). Die San het die hol stamme van die kokerboom vir hulle kokers (houers met pyle) gebruik – vandaar die naam kokerboom.

clip_image002clip_image004clip_image006

Groeibeskrywing

Die kokerboom (Aloe dichotoma) is ‘n boomagtige plant uit die aalwynfamilie. Die aalwyne is vetplante waarvan net enkele tot bome kan uitgroei. Die kokerboom het ‘n treffende voorkoms – veroorsaak deur die dik stam wat ongeveer 1 tot 2 meter bo die grond vertak met vlesige aalwynagtige blare.

Die kokerboom groei in goed gedreineerde sanderige en klipperige grond van die ariede en semi-ariede gedeeltes van Suid Afrika. Hierdie gebiede word gekenmerk deur warm somers en koue winters.

Besproeiing en grondtipe

Die kokerboom moet min water kry en in goed gedreineerde sand of klipperige grond geplant word.

Tuinplasing

Plaas die kokerboom op ‘n sonnige plek. Die kokerboom is ‘n eksemplaarplant en moet nie dig teen ander plante geplant word nie.

Plante vrot gewoonlik indien die grond nie goed gedreineerd is nie, hulle met ander plante moet kompeteer, hulle nie heeldag sonlig kry nie en indien die blare te gereëld deur reën of besproeiing benat word.

Blomme

Kanariegeel aalwynagtige blomme verskyn in die lente. Die blomme se nektar lok voëls en insekte.

Hoogte en wydte

4m x 1,5m

Gehardheid

In die natuur groei die kokerboom in woestyne of semi-woestyne wat gekenmerk word deur koue winternagte en baie hoë somertemperature.

Voortplanting

Plant voort deur middel van saad.

Land van oorsprong

clip_image002[8]

Ariede en semi-ariede gedeeltes van Suid – Afrika.