Plant van die week – Philodendron selloum ‘Xanadu’

Gewone naam

Dwergselloum

Dwergselloum

Groeibeskrywing

Die Philodendron selloum ‘Xanadu’ of dwergselloum is ‘n dwergweergawe van die gewone Philodendron selloum. Die dwergselloum is meer kompak as die gewone Philodendron selloum, met kleiner blare. Waar die gewone selloum etlike meters hoog kan groei, word die dwergselloum slegs ongeveer 50cm hoog.

Die gewone selloum, dwergselloum en die Monstera deliciosa word soms verwar. Die drie soorte kan egter maklik aan hulle blare van mekaar onderskei word – die gewone selloum en die dwergselloum se blare is getand, waarteenoor die Monstera deliciosa se blare geperforeerd is. Die blare van die dwergselloum is aansienlik kleiner as die blare van die gewone selloum.

Die verskil tussen die gewone selloum, dwergelloum en die Monstera deliciosa word in die bygaande foto uitgebeeld. Die blaar aan die linkerkant is van die gewone selloum, die middelste klein blaartjie is van die dwergselloum, terwyl die regterkantste geperforeerde blaar van die Monstera deliciosa afkomstig is.

Dwergselloum

Kliek hier vir meer inligting oor Philodendron selloum.

Kliek hier vir meer inligting oor Monstera deliciosa.

Tuinplasing

Die dwergselloum is gevoelig vir ryp en direkte sonlig en moet daarom op ‘n beskutte plek in die skadu geplant word. Ideale loofplante vir beddings waar kompakte plante verkies word wat nie bo ander plante moet uitgroei nie. Ook gewild as houerplant op patios en binneshuis.

Hoogte en wydte

Die dwergselloum word ongeveer 50 cm hoog. Uitlopers vorm maklik met die gevolg dat die plant sywaarts versprei.

Blomvorming

Wit, onopvallende aronskelkagtige blomme.

Gehardheid

Die dwergselloum moet op ‘n beskutte plek in gebroke of volle skadu geplant word.

Voeding en besproeiing

Plant in vrugbare grond wat maklik dreineer en gee genoeg water. Plante wat in direkte sonlig groei en nie genoeg water kry nie, se blare word maklik bleek en lelik.

Voortplanting

Vermeerder deur middel van verdeling.

Land van oorsprong

Tropiese Amerika

Waarskuwing

clip_image006Die dwergselloum is baie gevoelig vir wolluise. Die wolluise leef gewoonlik op die blare se onderkant en is dus nie maklik sigbaar nie. Die teenwoordigheid van wolluise sal veroorsaak dat die plant swak groei en die blare vergeel. Indien die wolluise nie betyds waargeneem en behandel word nie, kan hulle aansienlike skade veroorsaak. Blare se onderkante moet dus gereeld vir die teenwoordigheid van wolluise ondersoek word.