Plant van die week – Sago Palm (Cycas revoluta)

Gewone naam

Sago Palm (Die Sago Palm is egter nie ‘n palm nie. Die revoluta is verwant aan die broodboom, maar is nie soos deur baie aanvaar ‘n boodboom nie – die Suid Afrikaanse broodbome is spesies van die genus Encephalartos).

Groeibeskrywing

Groeitempo is redelik vinnig in vergelyking met broodbome, maar stadig in vergelyking met palms en ander plantsoorte. Plante van 50 jaar en ouer se stamlengtes is dikwels meer as 4 meter. Suiers kom dikwels voor. Die vroulike keëls (sien foto) is rond en ongeveer 40 cm in deursnit. Onder gunstige omstandighede kan keëlvorming 12 tot 14 jaar na ontkieming plaasvind.

Sago PalmSago Palm

Tuinplasing

Cycas revoluta kan as eksemplaarplante in die tuin, in beddings of as houerplante aangeplant word. Plant in volle son of in gedeeltelike skaduwee. Die Sago Palm is ‘n gewilde potplant vir binneshuis en ook langs opritte en op patios. Word ook dikwels as ‘n bonsai gekweek.

Grondtipe en besproeiing

Plant in goed gedreineerde sanderige grond. Gee matige hoeveelhede water, maar wees versigtig om nie te veel water gedurende die winter toe te dien nie.

Gehardheid

Die Sago Palm is rypbestand en temperature van soveel as minus 5 grade Celcius sal nie skade veroorsaak nie.

Verspreiding

Die Sago Palm is inheems in Japan.

Voortplanting

Plant maklik voort deur middel van saad of suiers.

waarskuwing Waarskuwing

Die Sago Palm is giftig. Geen deel van die plant mag ge-eet word nie en was hande goed nadat veral die saad hanteer is.